kuchh is tarah se hai mere asar men tanha.i
na dekh paa.e koi ik nazar men tanha.i
nikal ke ghar se akele nahin rahenge ham
hamare saath rahegi safar men tanha.i
hujum jismon ka milta hai muskurata hua
dilon men jhanke to hai har bashar men tanha.i
mire vajud ke andar utar ga.i shayad
azal se phaili hui thi jo ghar men tanha.i
miri tarah se koi aur bhi akela tha
pata chala jo paḌhi ik ḳhabar men tanha.i
ḳhayal aap ka aata hai aur jaata hai
kabhi hai bazm kabhi lamha-bhar men tanha.i
Leave a Reply