bas yahi to mudda.a hai aap ke irshad ka
‘shad’ kis ne naam rakkha ashiq-e-nashad ka
lijiye hazir hai nazrana dil-e-nashad ka
Talna asan na tha kuchh aap ke irshad ka
barq samjha hai jise saara zamana dekhiye
asman par chaḌh gaya lachha miri fariyad ka
hashr se ishq-e-nihan ki aur shohrat ho ga.i
ek aalam qissa-ḳhvan nikla miri rudad ka
be-ta.alluq ho ke rahna bagh-e-alam men muhal
pa-ba-gul hona to dekho sarv se azad ka
baghban sayyad gulchin sab ke sab dekha kiye
ashiyan ujḌa kiya ik ḳhanaman-barbad ka
tark-e-ulfat par jo main zinda raha ghabra ga.e
DhunDte hain ab naya pahlu koi bedad ka
zikr-e-dushman par mujhe jhuTlane vaale phir tu kah
tum ho muztar kya bharosa hai tumhari yaad ka
garmi-e-dagh-e-jigar se mom ho kar bah gaya
tum usi ḳhanjar ko samjhe the ki hai faulad ka
aankh se kuchh ho ishara kuchh tabassum lab pe ho
‘shad’ karna kuchh nahin mushkil dil-e-nashad ka
teri sab sunte hain meri koi sunta hi nahin
kis se ro.uun ja ke ab dukhḌa tiri bedad ka
‘shad’ yakta-e-jahan hai aap ke sar ki qasam
dekh lena ja-nashin hoga yahi ustad ka
Leave a Reply