tira gham rahe salamat yahi meri zindagi hai
tire gham se mere janan mire dil men raushni hai
miri mai-kashi ka hasil vo sharab ban ga.i hai
jo mili tiri nazar se jo tiri nazar se pi hai
tujhe samne biTha kar sada pujta rahun main
hai yahi miri ibadat yahi meri bandagi hai
mire dil men basne vaale tujhe kaise bhuul ja.un
tira ishq mera maz.hab tiri yaad zindagi hai
miri iltija hai tujh se miri bandagi badal de
ki tire karam miri jaan miri lau lagi hui hai
main faqir astan huun miri laaj rakh ḳhudara
ye jabin-e-shauq meri tire dar pe jhuk ga.i hai
main ‘fana’ ki manzilon men huun fana ki ba.ad zinda
tiri aarzu men miT kar mujhe zindagi mili hai
Leave a Reply