ham shahr men ik sham.a ki ḳhatir hue barbad
logon ne kiya chand ke sahraon ko abad
har samt falak-bos pahaḌon ki qataren
‘ḳhusrav’ hai na ‘shirin’ hai na tesha hai na farhad
barson se yahi ḳhvab hain nindon ki sajavaT
gulshan hai magar gul hai na bulbul hai na sayyad
huun ta.ir-e-be-bam charagh-e-sar-e-sahra
ummid-e-karam hai na mujhe shikva-e-bedad
jis ghar ko basaya tha miri be-ḳhabari ne
aaj us ko tiri ḳhud-nigari kar ga.i barbad
kuchh aisa dhuan hai ki ghuTTi jaati hain sansen
is raat ke ba.ad aaoge shayad na kabhi yaad
har zarra hai madfan miri hairat-nigahi ka
yarab! ye gali kuche hamesha rahen abad
kal apni bhi tasvir na pahchan sakenge
is daur ko baḳhshe ga.e vo ‘mani’ vo ‘bahzad’
sunsan hai zindan bhi bisan-e-dil-e-sha.er
ne shor-e-salasil hai na hangama-e-fariyad
ḳhurshid-e-qayamat utar aa.e rag-e-jan men
ai naghmagaro aisi koi tarz ho ijad
‘shohrat’ ki hai ab vaj.h-e-pareshani-e-ahbab
uTh ja.ega jis roz tu aa.ega bahut yaad
Leave a Reply