kisi se bhi nahin ham sabr ki talqin lete hain
hamen milti nahin jo chiiz us ko chhin lete hain
buḌhapa aa gaya lekin nahin badla mizaj un ka
abhi tak kapḌe vo apne liye rangin lete hain
faqiron ko kabhi dar se na ḳhali lauTne dena
dua.en dete hain ḳhairat jab miskin lete hain
vo saare log ranj-o-gham se pa jaate hain azadi
jo sub.h-o-sham vird-e-sura-e-yasin lete hain
tumhen hairat hai kyon ahal-e-filistin ki shuja.at par
yazidon se sada loha to ahl-e-din lete hain
Leave a Reply