Suhail Kakorvi
jazbon se farozan hain dahakte hue ruḳhsar
kya hashr-ba-daman hain dahakte hue ruḳhsar
raushan hai ajal aur abad un ki ziya se
ye rahmat-e-yazdan hain dahakte hue ruḳhsar
baḌhne lagi kuchh aur vahan atish-e-jazbat
dil men mere mehman hain dahakte hue ruḳhsar
kar di hai lab o chashm ne tasdiq hamari
husn-e-ruḳh-e-janan hain dahakte hue ruḳhsar
chingariyan uThti hain to lagti hain hamen phuul
jadu-e-baharan hain dahakte hue ruḳhsar
zulfon ki hava.en to ‘suhail’ aur ghazab hain
ab aag ka tufan hain dahakte hue ruḳhsar
Leave a Reply