Poet
karam ke is daur-e-imtihan se vo daur-e-mashq-e-sitam hi achchha
na zindagi ki ḳhushi hi achchhi na be-sabati ka gham hi achchha
talash ki sa.i-e-ra.igan par nazar to aate hain gharq-e-hairat
suḳhan-tarazi-e-rahnuma se sukut-e-naqsh-e-qadam hi achchha
ziya-e-nur-e-yaqin hai rahbar hayat ki tiira vadiyon men
bujha ke dekhen bujhane vaale charagh-e-taq-e-haram hi achchha
talab ki azmat talab ki zahmat talab ka hasil talab ki lazzat
na ḳhauf-e-sud-o-ziyan hi achchha na ḳhatra-e-besh-o-kam hi achchha
ma.aal kya hoga baghbano sukun-faramosh irtiqa ka
nazar bhi aane lagi chaman men bahar-e-bagh-e-iram hi achchha
mujhe usi par hai naaz hamdam shikasta saghar ye hai to apna
kise sunata hai zikr-e-mazi bala se tha jam-e-jam hi achchha
havas ‘yaqub’ nukta-chin kyuun nazar hi to hai ye apni apni
nigah-e-zauq-e-buland men hai sar-e-ita.at ka ḳham hi achchha
Leave a Reply