Mohabbat Se Mukar Jaana Zaruri Ho Gaya Tha

mohabbat se mukar jaanā zarūrī ho gayā thā

palaT ke apne ghar jaanā zarūrī ho gayā thā

nazar-andāz karne kī sazā denī thī tujh ko

tire dil meñ utar jaanā zarūrī ho gayā thā

maiñ sannāTe ke jañgal se bahut tañg aa ga.ī thī

kisī āvāz par jaanā zarūrī ho gayā thā

maiñ sassī kī tarah sotī rahī aur chal diye tum

batā dete agar jaanā zarūrī ho gayā thā

ta.āqub ḳhud na kartī to mire aañsū nikalte

maiñ kyā kartī ‘qamar’ jaanā zarūrī ho gayā thā

Leave a Comment