qatra huun magar raunaq-e-sahra huun bura huun
mazlum ke zaḳhmon ka masiha huun bura huun
vo bai.at-e-fir.aun ke qaa.il hain so achchhe
main vaqt ke namrud se uljha huun bura huun
taghut-e-zamana ko vo dete hain salami
main us ko ḳhata-kar jo kahta huun bura huun
vo shahr men karte hain andheron ki tijarat
main zulm ki basti ka ujala huun bura huun
vo shah-e-sitam-kar ke kahte hain qaside
main nauha-e-mazlum jo karta huun bura huun
vo ḳhanqahi diin ke pairav hain azal se
main aaj talak sahab-e-illa huun bura huun
‘naqqash’ vahi la hai mire sher-o-suḳhan men
anjam shahadat hai main sachcha huun bura huun
Leave a Reply