sulagti ret ki qismat men dariya likh diya jaa.e
mujhe in jhiil si ankhon men rahna likh diya jaa.e
tiri zulfon ke saa.e men agar ji luun main pal-do-pal
na ho phir gham jo mere naam sahra likh diya jaa.e
mira aur us ka milna ab to na-mumkin sa lagta hai
use suraj mujhe shab ka sitara likh diya jaa.e
akela main hi kyuun aḳhir saja.un palkon pe taare
kabhi us ki bhi palkon pe sitara likh diya jaa.e
mujhe chhoḌa hai tapti dhuup men jis shaḳhs ne tanha
use bhi gham ki duniya men akela likh diya jaa.e
jo shab-ḳhun marta hai meri basti ke ujalon par
muqaddar us ke bhi ghar ka andhera likh diya jaa.e
kahin bujhti hai dil ki pyaas ik do ghunT se ‘anzar’
main suraj huun mire hisse men dariya likh diya jaa.e
Leave a Reply