main jis men rahti huun mera ghar hai
yahan ki divar-o-dar ke andar
miri javani ke tane-bane
har ik rag-e-sang men ravan hain
yahan pe nikhri hui safedi
mire budhape ki aane vaali
sahar ka elaan kar rahi hai
yahan ki chhat mere dil se nikli hui dua hai
jo bargah-e-khuda men maqbul ho ke saaya kiye hue hai
yahan ki khidki yahan ke rauzan
miri hi ankhon ke khvab hain
kuchh men raushni kuchh bujhe bujhe hain
yahan pe kuchh log rah chuke hain
yahan pe kuchh log rah rahe hain
hamare mabain kya hai maazi ke rabte hain
vo rabte jin pe sirf meri giraft mahfuz rah gai hai
jabhi to aisa hua hai aksar
main apne hathon ko khud jhatak kar
nikal padi aise raste par
jo baal se bhi mahin
talvar ki tarah
tund o murtaish tha
main kat ke gir jaana chahti thi
bikhar ke mar jaana chahti thi
magar na-jane mujhe hua kyaa!
bajae is ke ki niche dekhun
miri in ankhon ne pichhe dekha
vahin jahan ek ghar khada tha
vo jis ki khidki vo jis ke rauzan
miri hi ankhon ke khvab the, kuchh men raushni, kuchh bujhe bujhe the!!
Leave a Reply