Udas Tum Hi Nahin Ho Hayat Hai Shayad

udaas tum hī nahīñ ho hayāt hai shāyad

thakī thakī se kahīñ kā.enāt hai shāyad

rukī rukī sī ye sāñseñ jhukī jhukī sī nigāh

us ek baat meñ ik aur baat hai shāyad

maiñ tum ko jiit rahā huuñ tumheñ patā hī nahīñ

ye aur baat ki merī hī maat hai shāyad

kahāñ kā ishq magar us ko kaun samjhā.e

parī-ḳhisāl farishta-sifāt hai shāyad

zamīn jaagī huī hai zamāna jaagā huā

ki aaj raat koī vārdāt hai shāyad

har ek gaam pe raushan karo diye se diyā

tulū-e-sub.h se pahle najāt hai shāyad

abhī to sham.a se shabnam banegī aañkh ‘sanā’

abhī to ek pahar aur raat hai shāyad

Leave a Comment