husn-e-surat dekh kar rang-e-tabi.at dekh kar
mahv-e-hairat huun savad-e-bazm-e-ghurbat dekh kar
mujh se puchhe raaz ki baten mujhe ma.alum hain
kyuun pareshan ho koi nairang-e-fitrat dekh kar
vaqi.a hai vaqi.a ahl-e-nazar se puchhiye
husn bhi hairat men hai shan-e-mohabbat dekh kar
tez-gami muqtaza-e-josh-e-ulfat hi sahi
lekin ai rahrav nuqush-e-rah-e-ulfat dekh kar
ai vatan sub.h-e-vatan sham-e-vatan ahl-e-vatan
yaad aati hai tumhari dasht-e-ghurbat dekh kar
mere saaqi tere qurban kya kahun kis se kahun
zarf-e-mai-kash dekh kar rang-e-tabi.at dekh kar
be-ḳhudi men bhi ḳhayal-e-husn-e-ḳhuddari rahe
naghma-zan ho ‘raz’ rang-e-bazm-e-ghurbat dekh kar
Leave a Reply