nazar nazar se vo kaliyan khila khila bhi gaya
gul-e-murad ko qadmon men raundta bhi gaya
buland shaḳh ke gul ki tarah na haath aaya
vo rif.aton pe raha apni chhab dikha bhi gaya
mujhe naved-e-juda.i sunane aaya tha
juda hua to miri samt dekhta bhi gaya
vo zaḳhm zaḳhm pe marham lagane aaya tha
ada-e-baḳhiya-gari se unhen dikha bhi gaya
vo mera shola-jabin mauja-e-hava ki tarah
diye jala bhi gaya aur diye bujha bhi gaya
vo kam-nigah tha kam-zarf to na tha ki mujhe
pyala de bhi gaya tishnagi baḌha bhi gaya
suḳhan ke a.inon men dekh dekh apne nuqush
jhijak jhijak bhi gaya aur jhumta bhi gaya
miri hi tarah tha vo bhi junun ki zad men magar
mujhe sambhal ke ḳhud ko sambhalta bhi gaya
vo jis ka daman-e-shaffaf ab bhi hai be-dagh
vufur-e-shauq men mujh ko gale laga bhi gaya
us ik nazare men the kitne didani pahlu
vo mere haal pe roya bhi muskura bhi gaya
gham-e-vida.a men pinhan tha aur bhi ik gham
ki dil se shauq-e-mulaqat-e-barha bhi gaya
firaq-e-yusuf-e-gum-gashta kam na tha sadiq
ki mere haath se kan.an-e-quetta bhi gaya
Leave a Reply