Aarzu Jine Ki Thi Imkan Jine Ka Na Tha

Siddique Mujibi

aarzu jiine ki thi imkan jiine ka na tha

ḳhvahishen thiin saf-ba-saf saman jiine ka na tha

qarz tha tera so jite-ji tujhe lauTa diya

zindagi varna mujhe arman jiine ka na tha

dosti zahrab se ki ranj-o-gham se ki nibah

varna ye mahaul meri jaan jiine ka na tha

zindagi tu chhoḌ mera saath main be-zar huun

mera tera to koi paiman jiine ka na tha

main ne hansne ki aziyyat jhel li roya nahin

ye saliqa bhi koi asan jiine ka na tha

kuchh tiri rahmat pe takiya kuchh gunahon ki kashish

varna us duniya men to insan jiine ka na tha

zehn ki avargi minnat-kash-e-duniya na thi

zindagi ka bhi ‘mujibi’ dhyan jiine ka na tha