zindagi ham se ḳhafa ho jaise
ab dava ho na dua ho jaise
teri furqat men hua yuun mahsus
zindagi ek saza ho jaise
is tarah karta huun puuja teri
tu mohabbat ka ḳhuda ho jaise
aisa arman-e-mulaqat bhi kiya
dil men tufan bapa ho jaise
ab to ehsas-e-tamanna bhi nahin
qafila dil ka luTa ho jaise
mere honTon pe tira zikr-e-jamil
har nafas mauj-e-saba ho jaise
teri ankhon se barasti masti
ek mai-ḳhana khula ho jaise
gham se milti hai masarrat dil ko
gham bhi teri hi ada ho jaise
jhanjhana uTTha hai dil ka har taar
aap ka naam suna ho jaise
vo pasheman hain tabahi pe miri
ye bhi un ki hi ḳhata ho jaise
talḳhi-e-jam men pinhan ‘sahir’
dard dil ki bhi dava ho jaise
Leave a Reply