Hazin Hai Bekas-O-Ranjur Hai Dil

hazin hai bekas-o-ranjur hai dil

mohabbat par magar majbur hai dil

tumhare nuur se maamur hai dil

ajab kya hai ki rashk-e-tur hai dil

tumhare ishq se masrur hai dil

abhi tak mast hai makhmur hai dil

kiya hai yaad us yad-e-jahan ne

ilahi kis qadar masrur hai dil

bahut chaha na jaaen tere dar par

magar kya kijiye majbur hai dil

faqiri men use hasil hai shahi

tumhare ishq par maghrur hai dil

tire jalve ka hai jis din se maskan

javab-e-jalva-gah-e-tur hai dil

do-alam ko bhula den kyuun na ‘akhtar’

ki us ki yaad se maamur hai dil

Leave a Comment