Aa Gaya Dil Jo Kahin Aur Hi Surat Hogi

aa gaya dil jo kahin aur hi surat hogi

log dekhenge tamasha jo mohabbat hogi

dil-lagi tark-e-mohabbat nahin taqsir muaaf

hote hote mire qaabu men tabiat hogi

un ke aane ki khabar sun ke to ye haal hua

jab vo aenge to phir kya miri halat hogi

tukde kar Daale koi us ke to main bhi khush huun

dil na hoga na miri jaan mohabbat hogi

vo chhupaya karen is baat se kya hota hai

aap sar chadh ke pukaregi jo ulfat hogi

ye na farmao shab-e-hijr kategi kyunkar

tum ko kya kaam jo hogi miri halat hogi

maar Daala mujhe be-maut bada kaam kiya

khuub tarif tiri ai shab-e-furqat hogi

ai dil-e-zar maza dekh liya ulfat ka

ham na kahte the ki is kaam men zillat hogi

ye bhi kuchh baat hai phir vasl na ho ai ‘jauhar’

ranj rahat se hua ranj se rahat hogi

Leave a Comment