Raunaq Hi Nahin Uski Hum Ruh-O-Rawan Bhi Hain

raunaq hi nahin us ki ham ruh-o-ravan bhi hain

lekin hamen duniya ki ḳhatir pe garan bhi hain

ik tere hi kuche par mauquf nahin hai kuchh

har gaam hain ta.aziren ham log jahan bhi hain

gulchin ko nahin shayad is raaz se agahi

shabnam men nahae gul sho.alon ki zaban bhi hain

khate the qasam jin ke kirdar-o-amal ki ham

shamil saf-e-a.ada men vo ham-nafasan bhi hain

sach kahte ho ham aise zarron ki haqiqat kya

ab kaun kahe tum se ham sang-e-giran bhi hain

Leave a Comment