Azhar Abbas
miri kahani tiri kahani se muḳhtalif hai
ki jaise ankhon ka pani, paani se muḳhtalif hai
vo ek lamha jo dastaras men nahin raha hai
vo zindagi bhar ki ra.igani se muḳhtalif hai
ye jhiil ankhen hamen jo paigham de rahi hain
vo tere honTon ki tarjumani se muḳhtalif hai
tiri juda.i ka hadsa aisa hadsa hai
jo har haqiqat se har kahani se muḳhtalif hai
main dasht-e-vahshat ki ret huun aur tu ek dariya
miri ravani tiri ravani se muḳhtalif hai
Leave a Reply