ye soch soch ke bismil pe kya guzarti hai
ki dast-o-bazu-e-qatil pe kya guzarti hai
jo mere saath chalo chandni ki sair ko tum
to dekhna mah-e-kamil pe kya guzarti hai
meri tabahi pe munh pher kar na hans ai dost
nazar mila ke tu kah dil pe kya guzarti hai
charagh bujh ga.e parvane jal ke ḳhaak hue
na puchh sahab-e-mahfil pe kya guzarti hai
jo hans ke Duub ga.e haa.e un ko kya malum
ki ab safina-o-sahil pe kya guzarti hai
surur-e-fateh-e-manzil ke dekhne vaalo
ghurur-e-azmat-e-manzil pe kya guzarti hai
tamasha dekhne vaale samajh nahin sakte
tiri nazar pe mire dil pe kya guzarti hai
Leave a Reply