Shahida Majeed
jo gir ja.un sambhalna janti huun
havadis se nimaTna janti huun
shikast-e-a.ina tak baat pahunche
main is darja sanvarna janti huun
hai meri sadgi men husn aisa
tire dil men utarna janti huun
bharosa rakhna tum meri vafa par
main angaron pe chalna janti huun
nahin qaa.il main hargiz ḳhud-kushi ki
magar main tujh pe marna janti huun
huun paani ki tarah fitrat men apni
main har sanche men Dhalna janti huun
biphar ja.un to jaise lahar koi
chaTanon se bhi laḌna janti huun
junun ban kar jo Takra.un ḳhirad se
hadon se bhi guzarna janti huun
dua-e-nur paḌh leti huun aksar
balaon se nimaTna janti huun
mujhe ye bhi hunar aata hai janan
tiri qismat badalna janti huun
siyasat chhoḌ di hai main ne varna
main tera taḳht ulaTna janti huun
bhula deti huun aksar ranjishon ko
kahan tujh se main laḌna janti huun
vafa tu ne nahin ki mujh se lekin
tujhe main ab bhi apna janti huun
tire dil par jo apna haath rakh duun
main tera dil badalna janti huun
Leave a Reply