sar-ta-ba-qadam ek hasin raaz ka aalam
allah re ik fitnagar-e-naaz ka aalam
zulfon men vo barsat ki raton ki javani
aariz pe vo anvar-e-sahar-saz ka aalam
unvan-e-soḳhan ‘ghalib’ o ‘momin’ ka taghazzul
andaz-e-nazar bada-e-shiraz ka aalam
duz-dida nigahon men ik ilham ki duniya
nazuk se tabassum men ik ejaaz ka aalam
uljhe hue jumlon men shararat bhi haya bhi
jazbat men Duuba hua avaz ka aalam
is sadgi-e-husn men kis darja kashish hai
har naaz men ik jazba-e-ghammaz ka aalam
us said ko kya kahiye jo ḳhud aa.e tah-e-dam
dil men liye ik hasrat-e-parvaz ka aalam
yuun to na tasahul na taghaful na tajahul
kuchh aur hai us kafir-e-tannaz ka aalam
shoḳhi men shararat men matanat men haya men
jo raaz ka aalam tha vahi raaz ka aalam
Leave a Reply