ḳhuda bhi kaisa hua ḳhush mire qarine par
mujhe shahid ka darja mila hai jiine par
khanDar ke gumbad o mehrab jaag uTThenge
use kaho ki vo dhire se aa.e ziine par
lakir hai na koi rang hai na kalma hai
ye kaisa naqsh banaya hai mere siine par
abhi umiid na.i vus.aton ki qaa.em hai
abhi vo lauT ke aaya nahin safine par
chhaten bhi baT chukin angan bhi baT chuke lekin
chhiḌi hai jang ki haq kis ka hai dafine par
Leave a Reply