Mohammad Yusuf Rasikh
dil men jo tasavvur hai tiri zulf-e-rasa ka
samjha huun ise main to amal radd-e-bala ka
duniya men koi mujh sa gunahgar na hoga
main ḳhaak ka putla nahin putla huun ḳhata ka
jannat ki hai ummid to dozaḳh ka hai khaTka
dushvar hai maidan bahut bim-o-raja ka
huran-e-jinan ne hamen ankhon pe biThaya
dekhe to koi martaba tere shohda ka
saghar ki tamanna hai na shishe ki zarurat
mastana huun teri nigah-e-hosh-ruba ka
anvar-e-mohammad ke hain anvar-e-ilahi
didar mohammad ka hai didar ḳhuda ka
ik raaz hai ye bhi ki tiri tegh ka paani
chashma hai shahidon ke liye ab-e-baqa ka
allah ke mahbub ki nazron men hai e.ajaz
siine men jo allah ka ghar tha use taaka
be-a.i marun tum pe ki marna hai muqaddar
kyuun muft men ehsan uTha.un main qaza ka
marqad men bhi ummat ko na bhule shah-e-vala
allah-ghani dhyan hai kitna ghoraba ka
rauze pe kya arz mira hal-e-pareshan
ehsan na bhulunga kabhi bad-e-saba ka
jis ḳhaak pe ashiq ne kiye sajdon pe sajde
ḳhaka tha vahan aap ke naqsh-e-kaf-e-pa ka
arbab-e-karam phulte-phalte hain hamesha
milta hai samar un ko gharibon ki dua ka
‘rasiḳh’ ki zaban par ho dam-e-marg ye misra
mahbub ki ummat men huun banda huun ḳhuda ka
Leave a Reply