Judai Ke Alam Sahna Mujhe Achchha Nahin Lagta

Mohammad Naim Jawed Naim

juda.i ke alam sahna mujhe achchha nahin lagta

kisi ko alvida.a kahna mujhe achchha nahin lagta

mohabbat ke marahil hon ya maidan-e-adavat ho

kabhi jazbat men bahna mujhe achchha nahin lagta

vo itna ḳhubsurat hai ki us ke jism par saj kar

koi zevar koi gahna mujhe achchha nahin lagta

suno manzur hain ab to mujhe na-haq saza.en bhi

sada mulzim bane rahna mujhe achchha nahin lagta

rifaqat ke ma.ani jis ne samjha.e mujhe barson

ab us ko bevafa kahna mujhe achchha nahin lagta

mira to silsila hai ḳhirqa-poshon ke qabile se

mujhe mat ḳhil.aten pahna mujhe achchha nahin lagta

kinaron ki alag hi baat hoti hai ‘na.im’ apni

jaziron par sada rahna mujhe achchha nahin lagta