Poet
ilahi dil vo de jo mahram-e-asrar ho jaa.e
kahin aisa na ho jiina mira be-kar ho jaa.e
vo kaisa dil hai dil jo dard se bezar ho jaa.e
vo kaisi zindagi jo zindagi par baar ho jaa.e
isi men hai ḳhushi har gham se mujh ko pyaar ho jaa.e
jo hona ho vo meri jaan ko azar ho jaa.e
anadil naghma-zan hon to chaman bedar ho jaa.e
pareshan bu-e-gul ho to faza sarshar ho jaa.e
alam-bardar-e-amn-o-ashti hoshyar ho jaa.e
taqaza vaqt ka ye hai ki duniya-dar ho jaa.e
ye maana parda-dari bhi bahut pur-lutf hoti hai
bura kya hai mohabbat ka agar iz.har ho jaa.e
mizaj-e-ahl-e-dil ki imtiyazi shaan to dekho
jo dushman jan-o-dil ka hai usi se pyaar ho jaa.e
kuchh aisi baat ho jo mujib-e-taskin-e-ḳhatir ho
vo kya iqrar hai jo ba.is-e-azar ho jaa.e
main apni vaz.a-dari haath se jaane nahin dunga
agar saara jahan bhi darpai-e-azar ho jaa.e
gham-o-andoh men to muskurana meri fitrat hai
rahun afsurda-dil to zindagi dushvar ho jaa.e
mujhe bechargi bhi vo ata kar dekh kar jis ko
koi ham-dam koi monis koi gham-ḳhvar ho jaa.e
vo harf-e-arzu jis par mukammal zabt hai ab tak
kahin aisa na ho sharminda-e-iz.har ho jaa.e
numa.ish to baja hai jalva-e-husn-e-mujassam ki
ye lazim hai nazar sha.ista-e-didar ho jaa.e
gham-o-alam hi men hausle dil ke nikalte hain
agar asaniyan hon zindagi dushvar ho jaa.e
bashar ko dekhiye da.ava hai tasḳhir-e-do-alam ka
ḳhuda jaane ye kya kar de agar muḳhtar ho jaa.e
‘kanval’ mai-ḳhvar kya jaane surur-e-be-ḳhudi kya hai
usi se puchhiye jo be-piye sarshar ho jaa.e
Leave a Reply