kahin ḳhulus ki ḳhushbu mile to ruk ja.un
mire liye koi aansu khile to ruk ja.un
main us ke saa.e men yuun to Thahar nahin sakta
udaas peḌ ka patta hile to ruk ja.un
kabhi palak pe sitare kabhi labon pe gulab
agar na ḳhatm hon ye silsile to ruk ja.un
vo ek rabt jo itna baḌha ki TuuT gaya
simaT ke joḌ de ye fasle to ruk ja.un
bahut tavil andheron ka hai safar ‘tahir’
kahin jo dhuup ka saaya mile to ruk ja.un
Leave a Reply