is tavaqqo.a pe khula rakkha gareban apna
jaane kab aan mile jan-e-baharan apna
lamhe lamhe ki rifaqat thi kabhi vaj.h-e-nashat
mausam-e-hijr hua ab sar-o-saman apna
nit-na.e ḳhvab dikhata hai ujalon ke liye
vo ki hai dushman-e-jan dushman-e-iman apna
nik.hat-e-gul hi nahin ḳhaak bhi hai ham ko aziiz
apna sahra hai chaman apna ḳhayaban apna
dekh leti hai jahan azm-o-yaqin ke paikar
ruḳh badalti hai vahan gardish-e-dauran apna
ye to maana ki hui ishq men rusva.i bahut
ho gaya naam ghazal men to numayan apna
us se bichhḌe hain to mahsus hua hai ‘nasir’
haal itna to na tha pahle pareshan apna
Leave a Reply