Tariq Naeem
mujhe zindagi se ḳhiraj hi nahin mil raha
abhi us se mera mizaj hi nahin mil raha
main bana raha huun ḳhayal-o-ḳhvab ki bandishen
miri bandishon ko rivaj hi nahin mil raha
mujhe saltanat to mili hui hai jamal ki
kisi ishq ka koi taaj hi nahin mil raha
mujhe milne aa.ega shaam ko mira ham-suḳhan
mira a.ina mujhe aaj hi nahin mil raha
mire charagar ko paḌi hui hai ilaaj ki
mujhe is ka koi ilaaj hi nahin mil raha
mile karvan ye bahut hi duur ki baat hai
abhi karvan ka mizaj hi nahin mil raha
abhi phir raha huun main ap-apni talash men
abhi mujh se mera mizaj hi nahin mil raha
Leave a Reply