Hamari Aankh Ne Dekhe Hain Aise Manzar Bhi

Ali Ahmad Jalili

hamari aankh ne dekhe hain aise manzar bhi

gulon ki shaḳh se laTke hue the ḳhanjar bhi

yahan vahan ke andheron ka kya karen matam

ki is se baḌh ke andhere hain dil ke andar bhi

abhi se haath mahakne lage hain kyuun mere

abhi to dekha nahin hai badan ko chhu kar bhi

kise talash karen ab nagar nagar logo

javab dete nahin hain bhare hue ghar bhi

hamari tishna-labi par na koi buund giri

ghaTa.en ja chukin charon taraf baras kar bhi

ye ḳhuun rang-e-chaman men badal bhi sakta hai

zara Thahar ki badal ja.enge ye manzar bhi

‘ali’ abhi to bahut si hain an-kahi baten

ki na-tamam ghazal hai tamam ho kar bhi