Nazish Partap Gadhi
sar-phire karne lage hain jazb soz-e-dil ki baat
ab ḳhuda rakkhe to rakkhe aap ki mahfil ki baat
qafile vaalo ab aao aur aage baḌh chalen
kha chuke rahbar ka dhoka jaan li manzil ki baat
kitni nafrat ho rahi hai surat-e-sahil se ab
kitni hasrat se kiya karte the ham sahil ki baat
ho ke barham uThne vaale hain vo saare tishna-lab
aa.i hai hisse men jin ke saqi-e-mahfil ki baat
ḳhud hi ab raushan karenge apne gham-ḳhane ko ham
dekh li taaro tumhari sa.i-e-la-hasil ki baat
saare ammal-e-hukumat mujh se bad-zan ho ga.e
kar raha tha ek din main bismil-o-qatil ki baat
soch ai ‘nazish’ na ho ye bhi farari zehniyat
kar raha hai ahd-e-hazir men jo mustaqbil ki baat
Leave a Reply