ab safar ho to koi ḳhvab-numa le jaa.e
koi aa.e mujhe palkon pe uTha le jaa.e
ḳhud men jhumun kabhi auron ke liye lahra.un
is se pahle ki hava mera diya le jaa.e
haa.e vo aankh ki jo harf sujhati thi kabhi
ab sar-e-ku-e-ghazal kaun bula le jaa.e
us ne chaha bhi to kis zarf se chaha mujh ko
jaise siine men koi harf-e-dua le jaa.e
zindagi bhar ka safar ho ga.i chahat teri
ab jahan tak tire qadmon ki sada le jaa.e
dil ko dhaḌka hai ki sham.en hi bujhi thiin pahle
ab ke andhi mira ḳhema na uḌa le jaa.e
‘shauq’ dariyaon ka pindar nahin tum jaisa
ye jo biphre to bhara shahr baha le jaa.e
Leave a Reply