Rafi Raza
aana jaana hai to qamat se tum aao jaao
dar-e-iz.har-e-muravvat se tum aao jaao
vo tahayyur jo tumhen le ke yahan aaya tha
us tahayyur ki visatat se tum aao jaao
ham kisi samt bagulon ko nahin rokte hain
garmi-e-zuaq shararat se tum aao jaao
kaf uḌane pe bhi pabandi nahin hai koi
haan magar thoḌi nafasat se tum aao jaao
hamen ummid-e-balaghat to nahin hai tum se
bas zara thoḌi bulughat se tum aao jaao
kis ne roka hai sar-e-rah-e-mohabbat tum ko
tumhen nafrat hai to nafrat se tum aao jaao
tum ki tiflan-e-adab saath laga.e hue ho
kisi manqul shari.at se tum aao jaao
ham ne ash.ar ka darvaza khula rakkha hai
jab bhi ji chahe sahulat se tum aao jaao
Leave a Reply