Dilawar Ali Aazar
duur ke ek nazare se nikal kar aa.i
raushni mujh men sitare se nikal kar aa.i
jis ne kashti ko Duboya sar-o-saman samet
vo ghani mauj kinare se nikal kar aa.i
raakh jhaḌi jo badan ki to achanak bahar
aag hi aag sharare se nikal kar aa.i
peḌ mab.hut hue dekh ke is manzar ko
dhuup jab us ke ishare se nikal kar aa.i
aankh men ashk riyazat se hua hai paida
ye nami vaqt ke dhare se nikal kar aa.i
kaun takiya kare mahtab ki us raushni par
samne bhi jo sahare se nikal kar aa.i
ḳhud bhi hairan huun ye soch ke ‘azar’ ab tak
zindagi kaise ḳhasare se nikal kar aa.i
Leave a Reply