shama ka mai ka shafaq-zar ka gulzar ka rang
sab hain aur sab se juda hai lab-e-didar ka rang
aks-e-saqi se chamak utthi hai saghar ki jabin
aur kuchh tez hua bada-e-gulnar ka rang
shaikh men himmat-e-rindan-e-qadah-khvar kahan
ek hi jaam men ashufta hai dastar ka rang
un ke aane ko chhupaun to chhupaun kyuun kar
badla badla sa hai mere dar-o-divar ka rang
shafaq-e-subh-e-shahadat se hai tabinda jabin
varna aluda-e-khun tha ufuq-e-dar ka rang
aftabon ki tarah jaagi hai insan ki jot
jagmagata hai sira parda-e-asrar ka rang
vaqt ki ruuh munavvar hai nava se meri
asr-e-nau men hai miri shokhi-e-afkar ka rang
Leave a Reply