had-e-imkan ḳhalaon se pare mangta hai
lafz vo apne ḳhayalon se baḌe mangta hai
roz hota hai hamesha ke liye mujh se juda
roz uTh kar vo tahajjud men mujhe mangta hai
ek arsa hua is tark-e-marasim ko magar
ab bhi vo mujh se mohabbat ke sile mangta hai
zindagi ishq-e-butan men hai guzari jis ne
ab vo mandir bhi farishton se bhare mangta hai
ek TuuTi hui kashti ka musafir hai magar
qulzum-e-dard kinaron pe chaḌhe mangta hai
jo duaon ko samajhta tha ziyan harfon ka
log lakhon vo janaze men khaḌe mangta hai
apne dushman se vo chhupne ke liye mujh se ‘na.im’
apne bichhḌe hue yaron ke pate mangta hai
Leave a Reply