ishq ki divangi miT ja.egi
ya kisi ki zindagi miT ja.egi
ḳhatm ho ja.ega jab qissa huzur
aap ki hairangi miT ja.egi
aap bhi ro.enge shayad zar-zar
phuul jaisi ye hansi miT ja.egi
ek din bujh ja.enge ye mahr o maah
ya nazar ki raushni miT ja.egi
ya fana ho ja.engi galiyan tiri
ya miri avaz hi miT ja.egi
husn bhi barbad ho ja.ega dost
aur dil ki dil-kashi miT ja.egi
is qadar abad ho ja.enge log
hasrat-e-tamir hi miT ja.egi
Leave a Reply