Adeem Hashmi
aisa bhi nahin us se mila de koi aa kar
kaisa hai vo itna to bata de koi aa kar
ye bhi to kisi maan ka dulara koi hoga
is qabr pe bhi phuul chadha de koi aa kar
sukhi hain badi der se palkon ki zabanen
bas aaj to ji bhar ke rula de koi aa kar
barson ki dua phir na kahin khaak men mil jaae
ye abr bhi andhi na uda de koi aa kar
ye koh ye sabza ye machalti hui nadiyan
mar jaun jo manzil ka pata de koi aa kar
har ghar pe hai avaz har ik dar pe hai dastak
baitha huun ki mujh ko bhi sada de koi aa kar
is khvahish-e-nakam ka khuun bhi mire sar hai
zinda huun ki is ki bhi saza de koi aa kar
Leave a Reply