Iftikhar Naseem
na jaane kab vo palaT aa.en dar khula rakhna
ga.e hue ke liye dil men kuchh jagah rakhna
hazar talḳh hon yaden magar vo jab bhi mile
zaban pe achchhe dinon ka hi za.iqa rakhna
na ho ki qurb hi phir marg-e-rabt ban jaa.e
vo ab mile to zara us se fasla rakhna
utaar phenk de ḳhush-fahmiyon ke saare ghilaf
jo shaḳhs bhuul gaya us ko yaad kya rakhna
abhi na ilm ho us ko lahu ki lazzat ka
ye raaz us se bahut der tak chhupa rakhna
kabhi na laana masa.il gharon ke daftar men
ye donon pahlu hamesha juda juda rakhna
uḌa diya hai jise chuum kar hava men ‘nasim’
use hamesha hifazat men ai ḳhuda rakhna
Leave a Reply