ghar se nikal ke shahr ke raste ko ghurna
phir gham-zada si nazm ke misre ko ghurna
do mashghale aziiz hain is hijr-zad ko
bistar pe leTna kabhi pankhe ko ghurna
hargiz nahin huun main nahin huun koi aur hai
pagal sa aks dekh ke shishe ko ghurna
divangi ke ḳhauf se phir chiḳh chiḳh kar
kamre men jhankte hue bachche ko ghurna
kis haal ji raha huun main chaho jo janna
to dhuup men khaḌe hue paude ko ghurna
‘rahib’ dukhon ki gard men lipTe sitam-zarif
ashkon ka bojh jhelte takiye ko ghurna
Leave a Reply