Jaleel Manikpuri
kya hina ḳhun-rez nikli haa.e pis jaane ke ba.ad
ban ga.i talvar un ke haath men aane ke ba.ad
jam-e-jam ki dhuum hai saare jahan men saqiya
manta huun main bhi lekin tere paimane ke ba.ad
shukriya vaa.iz jo mujh ko tark-e-mai ki di salah
ghaur main is par karunga hosh men aane ke ba.ad
sham.a mashuqon ko sikhlati hai tarz-e-ashiqi
jal ke parvane se pahle bujh ke parvane ke ba.ad
ashna ho kar buton ke ho ga.e haq-ashna
ham ne ka.abe ki bina Daali hai but-ḳhane ke ba.ad
main karun kis ka nazara dekh kar tera jamal
main sunun kis ka fasana tere afsane ke ba.ad
sham-e-mahfil ka hua ye rang un ke samne
phuul ki hoti hai surat jaise murjhane ke ba.ad
sach ye kahte hain ki hansne ki jagah duniya nahin
chashm-e-ibrat hain chaman ke phuul murjhane ke ba.ad
fikr o kavish ho to niklen ma.ani-e-rangin ‘jalil’
la.al ugalti hai zaban ḳhun-e-jigar khane ke ba.ad
Leave a Reply