mire dhyan men hai ik mahal kahin chaubaron ka
vahan ja.un kaise rasta hai angaron ka
vahan hariyali ke kunj men ek basera hai
vahan dariya bahta rahta hai mahkaron ka
tum dil ka daricha khol ke bahar dekho to
amboh guzarne vaala hai dil-daron ka
miri ḳhalvat ko ye insanon ka jangal hai
miri vahshat ko ye sahra hai divaron ka
ik piile rang ki dhund jami hai chehron par
koi aa ke dekhe haal tire bimaron ka
ham qarya qarya mulkon mulkon phirte hain
duniya men koi des nahin banjaron ka
ḳhvab ki daulat chain se sone valon ki
taare ginna kaam hai ham bedaron ka
Leave a Reply