Masoom Sharqi
is atish-e-ḳhamosh ko sho.ala bana na de
chingariyon ke Dher ko koi hava na de
mushkil se kuchh hua hai mayassar mujhe sukun
maazi ka koi dard mujhe phir jaga na de
ghar phunkne se pahle mira tu ye soch le
sho.ala kahin ye tere bhi ghar ko jala na de
tufan nafas nafas hai qayamat qadam qadam
jab zindagi yahi hai to is ki dua na de
ik sham-e-arzu hai hamari anis-e-gham
hai ḳhauf tund jhonka ise bhi bujha na de
kuchh bhi kashish na baaqi rahegi hayat men
dil men ḳhayal-e-tark-e-mohabbat ḳhuda na de
ham jis ke raste men bichhate hain aaj phuul
vo kal hamari raah men kanTe bichha na de
‘ma.asum’ nafraton ka ye phaila hua ghubar
Dar hai ki mera naqsh-e-mohabbat miTa na de
Leave a Reply