Shaista Sahar
kab suni tum ne ragni meri
guftani hai ye ḳhamushi meri
ek aahaT se jagti huun main
ek dastak hai zindagi meri
abr-e-zulmat kise Darata hai
aur phailegi chandni meri
kaun Thahrega dekhna ye hai
daur-e-mina ya tishnagi meri
aah aaya hi tha vo sapne men
daf.atan aankh khul ga.i meri
vaj.h-e-bechaini kya bata.un main
chain tera hai be-kali meri
tujh pe guzre na alam-e-vahshat
tu na dekhe ye bebasi meri
is ne rakkha jo samne saghar
baḌh ga.i aur tishnagi meri
main to saa.e se apne katra.un
dekh ḳhud se ye kaj-ravi meri
tum farozan ho ik sitare se
mere andar hai raushni meri
tujh ko dekhun ya kuchh nahin dekhun
teri ḳhvahish hai didani meri
Leave a Reply