Zamin Phir Dard Ka Ye Saeban Koi Nahin Dega

zamīñ phir dard kā ye sā.ebāñ koī nahīñ degā

tujhe aisā kushāda āsmāñ koī nahīñ degā

abhī zinda haiñ ham par ḳhatm kar le imtihāñ saare

hamāre baad koī imtihāñ koī nahīñ degā

jo pyāse ho to apne saath rakkho apne bādal bhī

ye duniyā hai virāsat meñ kuaañ koī nahīñ degā

mileñge muft sholoñ kī qabā.eñ bāñTne vaale

magar rahne ko kāġhaz kā makāñ koī nahīñ degā

ḳhud apnā aks bik jaa.e asīr-e-ā.īna ho kar

yahāñ is daam par naam o nishāñ koī nahīñ degā

hamārī zindagī beva dulhan bhīgī huī lakḌī

jaleñge chupke chupke sab dhuāñ koī nahīñ degā

Leave a Comment