insha-allah-khan-insha

Gahe Gahe Jo Idhar Aap Karam Karte Hain

gaahe gaahe jo idhar aap karam karte hain

vo hain uth jaate hain ye aur sitam karte hain

ji na lag jaae kahin tujh se isi vaste bas

rafta rafta tire ham milne ko kam karte hain

vaqai yuun to zara dekhiyo subhan-allah

tere dikhlane ko ham chashm ye nam karte hain

ishq men sharm kahan naseh-e-mushfiq ye baja

aap ko kya hai jo is baat ka gham karte hain

galiyan khane ko us shokh se milte hain haan

koi karta nahin jo kaam so ham karte hain

hain talabgar mohabbat ke miyan jo ashkhas

vo bhala kab talab-e-dam-o-diram karte hain

ain masti men hamen did-e-fana hai ‘insha’

aankh jab mundte hain sair-e-adam karte hain

More Poems

Leave a Comment