dil ko halak-e-jalva-e-janan bana.iye
is but-kade ko kaba-e-iman bana.iye
tufan ban ke uThiye jahan-e-ḳharab men
hasti ko ik sharara-e-raqsan bana.iye
dauḌa.iye vo ruuh ki har zarra jaag uThe
ujḌe hue vatan ko gulistan bana.iye
phir dijiye nigah ko paigham-e-justuju
manzil se kyuun nazar ko gurezan bana.iye
aḳhir to ḳhatm hongi kahin qaid ki haden
yusuf ko aap raunaq-e-zindan bana.iye
phir apne dil men kijiye paida koi taḌap
phir mushkil-e-hayat ko asan bana.iye
‘jauhar’ asiriyon ki koi intiha bhi hai
azad ik nizam-e-pareshan bana.iye
Leave a Reply