Aftab Iqbal Shamim
hanpti naddi men dam tuuta hua tha lahr ka
vaqia hai ye september ki kisi sah-pahr ka
sarsarahat rengte lamhe ki sarkandon men thi
tha nasha saari faza men naginon ke zahr ka
thi sadaf men raushni ki buund tharrai hui
jism ke andar kahin dhadka laga tha qahr ka
dil men thiin aise fasad-amada dil ki dhadkanen
ho bhara balvaiyon se chauk jaise shahr ka
asman utra kinaron ko milane ke liye
ye bhi phir dekha ki pal tuuta hua tha nahr ka
aish-e-be-miad milti par kahan milti tujhe
meri mitti ki mahak men shaiba hai dahr ka
Leave a Reply