Saima Esma
ḳhali hathon men mohabbat banTti rah ja.ungi
apne ḳhali haath aḳhir dekhti rah ja.ungi
kuuch kar ja.enge sab dasht-e-vafa se qafile
ḳhvab ankhon men liye main soi hi rah ja.ungi
bhuul ja.ega koi mujh ko bujhane ka hunar
sub.h bhi aa.i to shab bhar se jali rah ja.ungi
pa.ungi jurm-e-mohabbat ki anokhi si saza
vaqt ke honTon pe main ik an-kahi rah ja.ungi
tum ne chhoḌa hai to raste aur raushan ho ga.e
tum ye samjhe the ki raste men khaḌi rah ja.ungi
vus.at-e-aflak men bhi nisbat-e-zohra kahan
TuuT kar bhi lamha bhar ki raushni rah ja.ungi
aaj socha hai ki ḳhud raste banana siikh luun
is tarah to umr saari sochti rah ja.ungi
Leave a Reply